UN-Habitat tərəfindən Bakıda təşkil edilən Ümumdünya Şəhərsalma Forumunun 13-cü sessiyası (WUF13) çərçivəsində Bakı Ağ Şəhər və PASHA Real Estate şirkəti arasında Sahilyanı kvartalı çərçivəsində bir sıra layihələrin birgə inkişafı üçün saziş imzalandı.
Sazişi PASHA Real Estate şirkətinin baş direktoru Özgür Geter və Bakı Ağ Şəhər layihəsinin icraçı direktoru Ruslan Sadıxov imzaladılar.
Sahilyanı kvartalı şimaldan 8 Noyabr prospekti, cənubdan isə Ağ Şəhər Bulvarı ilə həmsərhəddir.
Dayanıqlı inkişafa yönəlmiş kompleks yanaşmaya əsaslanan Sahilyanı kvartalı keyfiyyətcə yeni şəhər mühitinin yaradılmasına üstünlük verməklə yaşayış, kommersiya və ictimai məkanların balanslaşdırılmış birliyini nəzərdə tutur. Yeni iş planı layihənin daha çox nəzərəçarpan və strateji əhəmiyyətli hissələrindən biri olan nəqliyyat əlçatanlığının, hərəkət effektivliyininin və sahil boyunca ictimai məkanların keyfiyyətinin yaxşılaşdırılmasını hədəfləyir. Layihədə həmçinin iş, istirahət və kommersiya fəaliyyəti üçün bir sıra unikal şəhər zonalarının yaradılması, eləcə də Bakı Bulvarının 10 kilometr böyüdülməsi nəzərdə tutulur.
Saziş White City Mall, böyük ictimai dayanacağın, ictimai tədbirlərin keçirilməsi üçün meydanın, əlamətdar yaşayış və ofis binalarının, otellərin, konqres zalın və muzeyin birgə inkişaf etdirilməsini nəzərdə tutur.
Planlaşdırılan hündürmərtəbəli binalar və yeni Marina yaxta körpüsü paytaxt sahili üçün təkrarolunmaz bir görünüş yaradacaq və Bakı körfəzinin inkişafı üçün yeni imkanlar açacaqdır.
Həmçinin Sahilyanı kvartalında piyadaların maksimum rahatlığı üçün metro stansiyasının girişləri planlaşdırılıb.
Sahilyanı kvartalının layihəsinin işlənilməsində Atkins, Foster + Partners, Gensler, UNStudio, Chapman Taylor və digər aparıcı beynəlxalq konsaltinq və memarlıq şirkətləri iştirak ediblər.
PASHA Real Estate şirkəti Azərbaycan, Türkiyə, Monteneqro, Gürcüstan, Özbəkistan və ABŞ-də fəaliyyət göstərən, daşınmaz əmlak sahəsində regionun aparıcı beynəlxalq şirkət qruplarından biridir. Şirkət, müxtəlif daşınmaz əmlak sinifləri üzrə layihələr həyata keçirərək, inkişaf, tikinti, investisiyalar, aktivlərin və əməliyyat fəaliyyətinin idarə edilməsi sahəsində tam inteqrasiya imkanlarına malikdir.
PASHA Real Estate şirkətinin aktivlər toplusuna beynəlxalq bazarlarda dayanıqlı aktivlər və uzunmüddətli dəyərlər yaratmağa yönəlmiş otel, yaşayış, kommersiya və pərakəndə satış kompleksləri, ticarət mərkəzləri, biznes mərkəzləri, sərgi mərkəzləri və çoxfunksiyalı komplekslər daxildir.
Bakı Ağ Şəhər müasir şəhərlərin inkişaf istiqamətini — insanların uzunmüddətli perspektivdə necə yaşadığı, hərəkət etdiyi və qarşılıqlı əlaqədə olduğuna yönəlmiş strukturunu əks etdirir. Bütöv bir şəhər rayonu kimi düşünülmüş layihə ətraf mühitin bərpasını, infrastrukturu və ictimai həyatı vahid uzunmüddətli konsepsiya daxilində birləşdirir. Sahil boyunca davam etdirilən işlər bu təməli inkişaf etdirir və beynəlxalq təcrübəni yerli anlayışla birləşdirərək bu ərazini beynəlxalq səviyyədə tanınmış təyinat yerinə çevirəcək ictimai məkan yaradır.
Bakı Ağ Şəhər paytaxtın şəhərsalma inkişafı trayektoriyasında həlledici transformasiyanı təşkil edir. Əvvəllər “Qara Şəhər” sənaye rayonu kimi tanınan ərazi —neft emalı zavodlarının, anbarların və yararsız hala düşmüş torpaqların yüzillik konsentrasiyası hazırda, Azərbaycan Respublikası Prezidentinin Ətraf Mühitin Yaxşılaşdırılması haqqında Fərmanına uyğun olaraq həyata keçirilən genişmiqyaslı bərpa proqramının bir hissəsi olaraq yenidən qiymətləndirilir. Ciddi dayanıqlı inkişaf konsepsiyasına əsaslanan layihə dünyanın ən böyük çirklənmiş sənaye zonalarından birini yüksək həyat keyfiyyətini təmin etmək, investisiyalar cəlb etmək və uzunmüddətli iqtisadi imkanlar yaratmaq məqsədi daşıyan vahid və diqqətlə planlaşdırılmış şəhər rayonuna çevirir.
Qalereya
